الجيل هذا كان له ميزات كثيرة، منها اللعب عن طريق الانترنت (Online) ومنها أشياء تعوّدنا عليها مثل التطوّر في الرسومات. لكن فيه ميزة أضافت للجيل هذا اضافة كبيرة، وهي ثورة المطوّرين المستقلين (Indie Developers).
كثير من الألعاب الرائعة طلعت من المطوّرين المستقلين، لدرجة ان كثير من اللاعبين صاروا يهتمون بألعاب المطورين المستقلين، واهتمامهم فيها ما يقل عن اهتمامهم بالألعاب الضخمة من الشركات الكبيرة (AAA Games). قبل فترة قلت ان لعبة لون سورفايفور (Lone Survivor)، وهي من لعبة من مطوّر مستقل، أعطتني تجربة أفضل بمراحل من بيوند تو سولز (Beyond: Two Souls) على ان ميزانية اللعبتين تفرق فرق السما عن الأرض.
في مقابلة جديدة مع شاهد أحمد، من شخصيات سوني المعروفة واللي مسئول عن احضار ألعاب المطورين المستقلين الى أجهزة بلاي ستيشن، تكلم كلام ما يطمن، خصوصاً وان الكثير من اللاعبين يعتقد ان المطوّر المستقل لا زال لامع.
يقول شاهد: “الناس تقول ان ثورة المطوّر المستقل توها في بدايتها. وهذا غلط، ثورة المطوّر المستقل انتهت”.
شبّه شاهد الانتقال من الأجهزة القديمة للأجهزة الجديدة بالمباني القديمة والجديدة، وقال ان المباني القديمة -المطورين القديمين- بتكون موجودة، ولكن مع ظهور مباني جديدة – يقصد الأجهزة الجديدة- راح يطلع فيها ناس جديدين -يقصد مطورين جديدين-.
تكلم برضو شاهد عن مهمته في اقناع المطورين المستقلين في تطوير ألعابهم على أجهزة بلاي ستيشن، وانهم ما كانوا مهتمين بأجهزة بلاي ستيشن، ولا كان عندهم خبر ان سوني تبغى تدعمهم.
شي طبيعي اننا نشوف ظهور مطورين جديدين وألعاب تطلع وتغيّر في عالم صناعة الألعاب. من كان يتوقع ان فيه لعبة اسمها Gears of War بتاخذ نظام كاميرا Resident Evil 4 وتطوره وتبني أشياء رهيبة ثانية مثل نظام الاحتماء (cover system) الخرافي حقها؟ ومن توقع ان لعبة بتطلع اسمها LittleBigPlanet بتسوي ضجة كبيرة باضافتها لشي اسمه تكوين مراحل وتخلي اللاعبين يلعبونها؟ الأمثلة كثيرة، ولكن ما عندنا مجال نذكرها كلها.
يبدو لي ان بلاي ستيشن ما زالت متمسكة بالمطوّر المستقل، على الأقل في الوقت الحالي. تقدر تشوف هذا الاهتمام بارز في لعبة Resogun اللي بتنزل على بلاي ستيشن 4.
شخصياً، ماني متصور عالم ألعاب الفيديو بدون المطوّر المستقل، يمكن شاهد يقصد ان ظهورهم بيقل عن أول، ماهو اختفاءهم بشكل كامل. أرهب شي في المطوّر المستقل انه ما عنده قدرة يسوي دعايات ضخمة للعبته، لذلك غالباً تلقى اللاعبين فجأة ينصدمون بأن لعبة فلانية خرافية نزلت، وكلهم طبوا يلعبون فيها ويتكلمون عنها وعن روعتها.
وش كانت أفضل لعبة من تطوير مطوّر مستقل بالنسبة لك؟ وهل تتفق مع شاهد أحمد في كلامه؟ شاركنا برأيك في التعليقات!
