محمد عياش
قد لعبت لعبة ألهمتك تسوي شيء من إبداعك الخاص؟
كثير منّا تجيه هالحالة، تحس أنك تبغى تسوي لعبة مبنية على شيء شفته أو انك تبنيه من الصفر بس ما تعرف شلون؟
الفكرة
إذا جيت تطور لعبة؛ أول شيء فكر إيش إللي يميز لعبتك عن باقي الألعاب المشابهة، وخلي فكرتك جديدة ومبدعة مو بس “والله ودي أسوي لعبة حلوة”.
كيف تجيب أفكار مبدعة؟ عندك الكتب، الافلام، أو حتى ألعاب ثانية. حلو تكون الفكرة شاطحة وغريبة، بس مو مرة؛ لأن ممكن ما تعجب أحد أو يكون شبه مستحيل تسويها أو ما في أدوات تدعم إللي تحتاجه.
التصميم
ما تقدر تنسق وترتب الفكرة اللي في مخك و على طول تبدأ تطوير!!، لازم فيه مقدمات تضبط وضعك بها، مثلاً: خذلك أي دفتر و ابدأ بكتابة: الفكرة، مقتطف عن اللعبة، طريقة اللعب، ونوع الرسم – حتى لو ما كنت تعرف ترسم، بس تخيل كيف بتكون اللعبة -. بعدين خذ وقتك و فكر بالعناصر إللي تخلي اللعب حلو بالنسبة لك. خلصت تفكير؟ الحين ابدأ بتصميم أول مرحلة وسوي محاكاة في مخك كيف بتحل اللغز أو بتخلص المرحلة، وهذي الطريقه تُسمى (mind simulation)، و عدل على هالمرحلة إذا لقيت مشاكل. وسوّي شوية مراحل بس لا تصمم لعبة كاملة عشان إذا جاء وقت التطوير تقدر تعدل على بعض الاشياء، لا تبلش عمرك بإعادة تصميم المراحل من اول وجديد.
المحركات و اللغات
قبل لا نجي للتطبيق؛ لازم تحدد محرك ولغة برمجية تتعلمهم.
اللغات
Visual Basic.NET
اللغة جداً قوية من ناحية المزايا و الإمكانيات، اللغة تستخدم (%95) مصطلحات إنجليزية؛ فإذا تعرف إنجليزي ما بتواجه صعوبة بالتعلم و تقدر تحترف فيها لو قرأت كتاب أو دورة أونلاين أو حتى فيديوهات يوتيوب. مشكلتها أنك نادر تلقى محرك يستخدمها، لكنّه مدخل ممتاز للبرمجة و قريبة جداً من (GML) لغة محرك مذكورة تحت.
Pascal
تقريباً نسخ لصق من (Visual Basic.NET) مع فروقات بسيطة، وسبب ذكرها لأنها اللغة الأقرب من لغة (GML) المستخدمة في (Game Maker Studio).
#C (سي شارب)
اللغة الأقوى و الأكثر فعالية من بين كل اللي ذكرتهم، تجمع أساسيات من كثير من اللغات البرمجية: Object-Oriented (القدرة على التلاعب\التعديل في المواضيع اللي تجي بشكل وحدات أو صفوف بدون تفاصيل زيادة عشان التعقيد)، Component-Oriented (القدرة في التلاعب\التعديل في الأجهزة الخارجية إذا كان محرك الألعاب يدعم هالأجهزة مثل ال Oculus )، صياغة ألاوامر (كتابة جمل أمرية). بس اللغة مهيب ذيك السهولة، يبيلها دورات و كتب.
والبرمجة مهيب اسهل منها.
محركات
محرك الألعاب هو البرنامج الي يجمع كل عناصر اللعبة و يكملها من أوامر برمجية، و تحريك رسومات و تطبيق نصوص في اللعبة و أكثر ويخليها تطلع بالشكل إلي تشوفه على جهازك.
Game Maker Studio
يستخدم قوائم سهلة وبسيطة من حيث الفهم والتنقل بينهم. يسخدم (GML Game Maker Language) المشابهة جداً بـ (Visual Basic.NET) و (Pascal). تقدر عن طريق هالمحرك تطوير ألعاب (2D) و (3D)، لكن أغلب إستخداماته في (2D)، وفيه حسابات فيزيائية داخلية لكن موب بالدقة العالية. تقدر عن طريق هالمحرك تطور ألعاب جميلة مع شوية اكواد. والبرمجة في هالمحرك ما تحتاج اكواد كثيرة.
نسخ البرنامج: مجاني و هو إللي أنصح فيه، بعد كذا تقدر تشتري نسخ عديدة حسب المنصات إللي بتنشر عليها لعبتك، وحسب المزايا إللي تبيها. والسعر يوصل 799.99$، والحين يدعم ال (PS4) و (PS3) و (PS Vita)، إذا أنت مسجل كمطور عند سوني.
Unity
يستخدم قوائم بس مو سهلة التنقل وليست واضحة. يستخدم (Unity Script)؛ لغة برمجية من عند الشركة المطورة للمحرك وعنده الدعم الكامل للغة السي شارب (#C). يدعم (2D) و (3D)، وفيه محرك فيزياء داخلي ويدعم استخدام محركات فيزياء خارجية مثل (Nvdia PhysX). وايضا يدعم جرافيكس في (3D) بشكل جبار، وتقدر تشتري مجسمات وشخصيات ومراحل في حالة انك ما تعرف تسويها بنفسك. يدعم أجهزة خارجية مثل ال (Oculus) و (Leap Motion) اللي تستخدم سي شارب مثل ما ذكرت قبل.
نسخ البرنامج: مجاني وهذا شيء واسع الانتشار وكويس جدا، وفيه نسخة (Pro) اللي تعطيك مزايا كثيرة إحترافية و يدعملك النشر على أي منصة تفكر فيها من بلايسيشن (PS) و إكس بوكس (Xbox) و حتى وي يو (Wii U)!!. سعر نسخة (Pro) هو 1500$.
التطبيق
بعد ما صممت جزء من اللعبة وتعلمت التطوير؛ جرب المراحل إللي صممتها وكمل تصميم للنهاية. بعد ما عرفت إمكانياتك و إمكانيات المحرك واللغة؛ إبدأ بالتطوير بلحالك أو مع ناس.
الختام
قد تكون هذه مهنتك أو هواية وأنت اللي تحدد وش هي تكون. وإن شاء الله المرة القادمة نتكلم عن النشر وكيف تجيب جمهور وصجة للعبة.
هل تتوقع أنك تتعلم تطوير ألعاب بعد هذا المقال؟ ليش و ليش لا؟
أيمن اليغشي
احمد خالد
