ايش اللي يخوّف اللاعب؟

نبذة فكرية عن العاب الرعب

لما أتكلم عن العاب الرعب يخطر في بالي أشياء غير اعتيادية في حياتنا اليومية (يعني مو متعودين عليها في روتين يومي). أشوف الأشياء الغربية مخالفة لنمط الواقع(يعني أشياء شاطحة)، قلت بين نفسي يوم من الأيام لو كنت هناك وش أسوي؟؟ كيف بأعيش!!

في الأجواء المخيفة المميتة الكئيبة وش يصير لي هناك! مستقبلي مجهول كل قريب من قلبي اختفوا في أخر ليلة أنا وحيد في هذا العالم الشنيع: “انتشروا الوحوش بالمدينة بينما.. مازلت على قيد الحياة” مقولة جيل فالنتاين (Jill) المشهورة في Resident Evil 3.

سألت نفسي أكثر من مرة بخصوص الموضوع.

وش المميز في العاب الرعب؟

المميز في العاب زي كذا هي تجربة الفريدة من نوعها لما يصنع لنا مطور اللعبة بيئة مناسبة للمحتويات نقول مثلا: تصميم عالم العبه معبر لأجواء وطبع العبه زي في سايلنت هيل الي تتميز بتصاميم الوحوش الغربية والأماكن المهجورة الوسيعة الي يمديك تستكشف فيها وتضيع في المدنية وما تدري وين تروح وتسمع هماسات موسيقى الحادة في أذنك والضباب الي ماتدري وش يخبي لك من طرق ومصاعب.

ليش ألعب شيء يبي يخوفني؟

تقول النظرية العلمية أن الإنسان لما يولد ما يخاف إلا من خوفين: الصوت العالي والمرتفعات، والباقي مكتسبة. لما يصر الإنسان يستوعب الحياة بطبعه يخاف من الموت والمستقبل والفشل والمجهول(شي غير اعتيادي لروتين يومي وما يعرفه زين) وأنا العب ذي نوعية من العاب عشان في عناصر معينة تحمسني وانسجم معها في تجربة العبه وفي نفس الوقت هي من مخاوف الإنسان بأشرحها في الأسفل وأنا لازم أتغلب على مخاوفي وهنا عنصر تحدي في لعبة الي تجذبني أخلصها.

هذي المخاوف هي:

عنصر الخوف من فشل

زومبي يلحق وراي اقتله ولا انحاش منه لو قتلته ما يبقالي رصاص قليل واحتمال يجيني إصابة أو أموت. إيه هذا لمسة رزدنت إيفل الكلاسيكية (الجزء 1 و2 و3) الي تعتمد على أسلوب النجاة والبقاء على قيد الحياة (Survival). تخيلوا معاي أن في عملاق اسمه نيمسيس (Nemesis) فجأة طب عليك ومنت داري بسرعة وبضربة وحدة يموتك ما يمديك تنحاش منه بسهولة المكان مرة ضيق (عكس سايلنت هيل Silent Hill) لو تبي تموته لازم تطلق عليه فوق 100 رصاص مسدس(تحسبه سهلة؟ّ!)، وفوق هذا احتمال يرجع مرا ثاني أقوى في مكان محشور فيه زومبي لو كنت بعيد عنه يطيرك بالبازوكا وانتهت اللعبة. تحسب يبون يرجعونك مكان موتك؟ لا يا حبيبي حتى تخزين اللعب عدده قليل وبرضو مو في أي مكان في خريطة تسجل. لو مثلاً سجلت في مكان والمكان الي بعده في زعيم وحش وأنت مصاب ماعندك إسعاف ولا رصاص لازم تعيد لعبة بكبرها. المهم كنت شاري كرت تخزين (Memory Card) خصيصاً لرزدنت إيفل ، وهنا عنصر التحدي أنك تنجح(تختم لعبة) أو ترسب(جيم أوفر) لازم تحسب حسابك قبل الاختبار نيمسيس (Nemesis) ويفاجئك وكلنا نخاف نرسب في الاختبار الي هو فشل.

عنصر الخوف من المجهول

لكل إنسان مخاوفه الشخصية، لكن الأغلبية قد مر عليهم أنهم خافوا من الأشياء الي مو متعودين عليها أو ما يعرفون عنها زين. نعطي مثال: لو مثلاً جاك واحد قلك” اترك عائلتك وظيفتك وتعال في شركتنا وتربح أموال ” وش يضمنلك؟ ممكن شركة وهمية. مثال: شخص ماقد طلع برا المدينة وتمسكُه وتوديه ينام في البر تلقاه قلقان أو مو مرتاح عشان مو متعود عليه. الشيء المجهول حول محيط الإنسان ويتفاوت بمستويات ومراحل على حسب نظرته لما يصير كل شيء مجهول حوليك يطلع الرعب النفسي عشان النفس هو من صنع هذا الإزعاج هو من كبر هذا الخوف من مستوى منخفض إلى عالي.

هل الخوف يتطلب الصراخ وكذا؟

أنا ماقلتلك أكذب على نفسك بس في مشاعر داخلية أو مكتومة زي خوف طبيعي من موت والمجهول والفشل وغير طبيعي مثل الظلام وأشكال غريبة مقرفة وعلامات خوف مو بس أنك تصارخ هو يرجع على حسب عمر وشخصية اللاعب في شيء أسمه مشاعر داخلية من علامات خوف الداخلي: قلق وتوتر وعرق وتحس بالحرارة وصداع وتشتت وارتجاف اليد أو الرجل وتنفس سريع ..الخ.

لو مثلاً أحد قلي سلندر اللعبة الوحيد أنفجعت منها حبيبي بكل بساطة الطفل أكبر خوفه صوت العالي. سلندر يعتمد على هذا الشيء ويجيبلك صوت عالي في جزء من ثانية، وأنت طبعاً ردة فعلك غير إرادية (يعني مايمديك تتحكم فيها إلا مع تكرار). عموماً المجهول والتعقيد جزء أساس في رعب شيء ما تعرفه زين؛ بيت مهجورة ما في أحد يسكن فيه وسفاح يقتل الأبرياء بدون سبب ومرض انتشر بالمدنية ماله علاج وبشر يتحولون لمصابين (Zombie) فكيف يفكرون؟؟ كيف يأكلون أقرب الناس لهم ؟؟ ما عندي إجابة واضحة!!

كلمتي قبل ما تمشي

أدري ان فيه ناس تقول مو شرط المخاوف الي ذكرتها في العاب الرعب بس نسبة التركيز العالية هي في هذه النوعية من العاب الرعب والبقاء متعمقة زي رزدنت إيفل مهتمين أكثر شيء في أسلوب (البقاء:Survival) سايلنت هيل مهتمة في تصاميم الوحوش وعالمها وموسيقى، وصفت ليش أحب هذا المجال (على الرغم أنه قل هذي فترة) بسبب حبي الأجواء والعناصر الي قدمت لنا في تجربة العبه والي هي مخاوف الإنسان والجيمر مثل الخوف الطبيعي(يأثر فيك) من الموت والفشل والمجهول وغير طبيعي(مايأثر فيك) من ظلام وأشكال.

قبل ما نختم حبيت أقول أن التجربة أهم من الجودة؛ عشان تأثيرها اكبر وعكس جودة الي هي مع مرور زمن تصير مالها قيمة، وحبيت أوصف تجاربي مع العاب كلاسيكية وأتمنى أنكم استفدتم من مقالتي وأعجبتكم!