احد اللاعبين المدمنين على لعبة ديستني (Destiny) في امريكا سوا المستحيل لتجميع عملة نادرة يبغاها ليشتري سلاح معين من شخصية اسمها زور (Xur) داخل اللعبة.
في البداية للتوضيح زور يجي في اللعبة كل اسبوع ويكون معاه بضاعة خارقة ممكن تكون منتظرها من شهور، الاخ يجي كل يوم جمعة الساعة 12 الظهر ويمشي كل احد الساعة 12 الظهر، يعني لازم تلحقه وتشتري من عنده قبل لايروح لانه لو راح، الاسبوع اللي بعده راح يجي ببضاعة مختلفة عن الاسبوع اللي قبل والشيء اللي كنت بتشتريه راح يطير عليك لو مشي زور.
نرجع لخوينا الامريكي اللي اسمه لان فييستا (LAN Fiesta)، زور الاسبوع اللي راح جاب سلاح اسمه The Last Word، وخوينا حب هذا السلاح و نوى انه يشتريه، المشكلة انه السلاح يحتاج 23 قرش (Strange coins) للحصول عليه، و فييستا ماعنده 23 قرش. والقروش عملة نادرة في اللعبة و مو اي مكان تلقاها. فييستا كان معاه 16 قرش فقط يوم الجمعة، و قال لازم اشتري هذا السلاح باي طريقة.
اول شي سواه فييستا انه بنا شخصية جديدة ووصلها ليفل 25 في يوم واحد، وهذا الشيء يعتبر مو سهل للمعلومية لكنه جاب الليفل ودخل مهمة اسبوعية اعطته 6 قروش بعد ماخلصها، بالتالي بقى له قرش واحد بس. لما بقي له قرش واحد فقط في ذيك اللحظة عاصفة ضربت بيته وقطعت الكهربا عنه!
صاحبنا ما استسلم، اخذ الاكس بوكس ون تبعه مع التلفزيون و حطهم بسيارته و راح لمطعم ماكدونالدز لان عندهم انترنت مجاني. دخل وطلب سندويتش تشيز برجر مع مشروب كبير وبدأ يلعب.
معروف ان لعبة ديستني تعتمد على الحظ والعشوائية، و خوينا بدأ يلعب مهمات اسمها Vanguard ROC، هذي المهمات معروفة باللعبة انها ممكن تعطيك جوائز طيبة. بدأ يلعب فييستا من الساعة 10 الى الساعة 11، بعدها مطعم ماكدونالدز طرده وقاله لازم نقفل المطعم.
اخونا لسه ماجات القرش، قام ركب سيارته وراح لمطعم اسمه Taco Bueno، لما وصل وقال للموظفين حالته اتعاطفوا معه واعطوه صحن ناتشوز مجاني!
لعب 7 مهمات Vanguard ROC و تقريبا الساعة 1 الليل جاب القرش اخيرا بعد العناء، في ذاك الوقت المطعم كان مقفل من الخارج و مابقي وسطه غير الموظفين اللي كانوا متحمسين معه.
اتقابل فييستا مع احد المجلات وقالهم عن الحادثة، قال فييستا: “بعد ما قلت للعاملتين تبع مطعم تاكو بوينو شكرا على استجابتكم لطلبي ردوا علي وقالوا ’هذي ديستني، احنا متفهمين معاناتك’ وهذا الشيء حسسني ان العاملتين تبع المطعم كانوا معي طول وقتي في البحث عن سلاح The Last Word وان كل وقتي اللي حطيته في اللعبة كان على شي يسوى”
صراحة الرجال يستاهل تحية، اعطى مثال يحتذى به للجد والمثابرة. ولو ان اللعبة احيانا تخذلك و ماتعطيك الشيء اللي تبغاه لكنه كان مصر و مؤمن انه راح يشتري السلاح.
وش رأيكم باللاعب المدمن هذا؟
