نزلت أخيراً اللعبة المنتظرة Grand Theft Auto 5، ومثل ماهو متوقّع حصدت عشرات في تقييمات أغلب مواقع الألعاب العالمية. وصراحه شركة Rockstar سوت جهد خرافي في استغلال قوة أجهزة الجيل الحالي عشان تدعم مميّزات اللعبة، لكن طبعاً فيه سؤال ينعاد دائماً مع الألعاب القوية اللي تنزل على جهازين أو أكثر: “وش أفضل نسخة؟”
أبرز اختلاف بين النسختين الموجودة حالياً (بلايستيشن 3 و اكس بوكس 360) هو في عدد الاطارات في الثانية.
اذا ما كنت تعرف وش سالفة الاطارات هذي، فخلّنا نبسّطها ونقول ان كل ما زاد عدد الاطارات في الثانية كل ما صارت الصورة أنعم وأدق. شف المقارنات في هذا الموقع وبيوريك الفرق بين حركة 15 اطار و 30 اطار و 60 اطار.
الحين خلنا نشوف عدد الاطارات بين نسخ اللعبة الحالية حسب اختبار قناة Digital Foundry..
مقارنة عدد الاطارات بين بلايستيشن 3 و اكس بوكس 360
الخط الأزرق هو مقياس عدد الاطارات في نسخة البلايستيشن 3، والخط الأخضر للاكس بوكس 360
بتلاحظ ان عدد الاطارات في نسخة الاكس بوكس 360 بشكل عام أفضل من البلايستيشن 3، وهالشي ممكن يخليك تفترض انها النسخة الأفضل بما ان الجرافيكس في النسختين قريب جداً من بعض. لكن لو تدقّق بتلاحظ ان التفاصيل في البلايستيشن 3 أكثر شوي، وهذا له تأثير على عدد الاطارات. لاحظ المقارنة في الصورة بين النسختين:
يعني على الرغم من ان كل نسخة تتميّز بميزة بسيطة عن الثانية، الا انهم متوازنين تقريباً.
بينما لو فيه نسخة للبي سي، فغالباً راح تحل مشاكل النسختين كلها، وتشتغل بعدد اطارات أكبر. بالضبط زي ما صار في Grand Theft Auto 4.
مقارنة عدد الاطارات بين جميع الأجهزة في Grand Theft Auto 4
لاحظ كيف ان عدد الاطارات في نسخة البي سي يستقر اغلب الوقت على 50 اطار في الثانية (كمتوسّط)، وبديهياً الجرافيكس والاداء التقني عموماً بيكون أفضل اذا كان عندك جهاز كويّس. عشان كذا تشوف ناس كثير مسوين زحمة على نسخة البي سي، وينتظرون أي تصريح رسمي من الشركة عشانها. فيه ناس كثير حتى قرروا ما يشترون اللعبة على الاجهزة المنزلية عشان ياخذون التجربة كاملة وبأفضل صورة ممكنة على البي سي.
أي نسخة أفضل؟
شخصياً أشوف النسختين متوازنات جداً وما تفرق أي وحدة تشتري. شف عاد انت وش يهمك: عدد الاطارات الأعلى في الاكس بوكس 360 وبالتالي صورة أنعم على الرغم من الدقه الأقل بشوي، أو التفاصيل الاضافية اللي في البلايستيشن 3 مع عدد اطارات أقل شوي. أو يمكن تكون من الناس الصبورين جداً اللي ممكن ينتظرون نسخة البي سي ويريحون روسهم.
أهم شي اذا كنت ناوي على نسخة الاكس بوكس 360 فلا تثبّت الديسك الثاني على الجهاز عشان ما تطلع اللعبة مفقّعة زي الشاشة اليمنى في هالفيديو:
أي نسخة شريت أو ناوي تشتري؟ شاركنا برأيك في التعليقات!
