كثير من اللاعبين تفرق معه قضية نزول اللعبة على أي جهاز. لو قلنا ان اللعبة الفلانية بتنزل حصرياً على البلاي ستيشن، بنشوف ناس كثير بيتحمسون لها وينتظرونها. طبعاً، قضية التعصب لها دور كبير في هذا الموضوع، ولكن البعض فعلاً تفرق معه سالفة نزول اللعبة على أي جهاز.
ما أتوقع كثير بيختلفون معي لو قلنا ان الكمبيوتر (PC) هو الأفضل من النواحي التقنية، ولو اني أختلف مع اللي يقول ان البي سي يعطيك تجربة أفضل. لكن لو افترضنا ان لعبة نزلت على البلاي ستيشن والاكس بوكس والبي سي، غالباً نسخة البي سي راح تكون متفوقة من النواحي التقنية، وهذي صرعة صاروا اللاعبين يبحثون عنها في الجيل هذا.
اليوم في مقابلة مع جويتشي سودا (Suda 51) المطوّر الشاطح، اللي سوّا ألعاب مثل كيلر 7 (Killer7) وتشينسو لولي بوب (Chainsaw Lollipop) وغيرها، سألوه عن هذا الموضوع وجاوب بشكل مثير للاهتمام.
يقول سودا: “أتوقع ان اللعبة نفسها أهم من موضوع على أي جهاز بتنزل، برضو أتوقع ان اللاعب يلعب أنواع مختلفة من الألعاب، ماهو بس الألعاب الضخمة والمشهورة. ألعاب المطوّرين المستقلين ماهي سيئة بالضرورة -يقصد ان ما عليها ميزانيات كبيرة-، أتوقع اننا اليومين هذي انتقلنا لفترة صار بامكانك تلعب أنواع مختلفة من الألعاب فيها، وكل هالألعاب تعطيك تجربة جيدة”.
أتوقع الكثير بيتفق مع كلامه في البداية، وهو ان اللعبة نفسها هي اللي تهم، ماهو الجهاز اللي بتنزل عليه. برضو أتفق معه تماماً في قضية ألعاب المطورين المستقلّين، الميزانيات الضعيفة ما تعنى بالضرورة ان اللعبة بتكون سيئة.
شخصياً، أتفق مع كلام سودا كثير. ما يهمني على أي جهاز بتنزل اللعبة طالما ان اللعبة ممتازة، برضو كون الجهاز موجود عندي تفرق. كثير من الألعاب فاتتني، ولولا ان أحمد الراشد أنقذني وأعطاني جهاز الـWii حقه ولا ما كان حصل لي فرصة ألعب زينوبليد كرونيلكز (Xenoblade Chronicles) اللعبة اللي مبسوط معها مرة هاليومين.
برضو كون اللعبة بتنزل على كل الأجهزة في العالم أحسها تنزّل من قيمة اللعبة بالنسبة لي. غالباً أكون راضي بنزول اللعبة على البلاي ستيشن والاكس بوكس والبي سي. أكثر من كذا أحس ان الناشر يبغى ينشر لعبته بدون اهتمام حقيقي وكافي للعبة نفسها.
نزول اللعبة على جهازي المفضل يشجعني على اني ألعبها برضو، أذكر ماس إيفيكت (Mass Effect) شريتها على البي سي ولا قدرت أكملها، وأخذتها برضو على الاكس بوكس ولا قدرت أكملها، نزلت الثلاثية كاملة على البلاي ستيشن ولسبب ما قدرت أكملها!
وش رايك أنت في هذا الموضوع؟ هل تفرق معك كون اللعبة نزلت على البلاي ستيشن او الاكس بوكس؟ شاركنا برأيك في التعليقات!
