لعبة جوال باسم Game of War (حتى الاسم ما تعبوا فيه كثير) سوّت دعاية مع عارضة الأزياء المعروفة Kate Upton، ويبدو ان خطوتهم هذي كانت ناجحة تماماً، بغض النظر عن الاخلاقيات أو حقوق المرأة. صحيفة LA Times كتبت في خبر ان بعد الدعاية هذي، ارتفعت مبيعات اللعبة الى درجة مهولة، اللعبة صارت تجيب لهم أرباح بقدر 1 مليون دولار يومياً.
الدعاية، واللي ما راح نعرضها في موقعنا لأسباب أخلاقية (بالاضافة الى اننا ما نبي نعلّق قلوب الجيمرز)، تعرض لك الفتاة الحسناء وهي لابسة قصير -طبعاً- وتطلع في لقطات اغراء مثل لقطة لها في مسبح خاص فيها، أو وهي راكبة خيل، وغيرها من السخافات اللي نشوفها في التلفزيون. الدعاية تم عرضها لأكثر من 9 آلاف مرة، بعضها كان في أوقات مناسبة، مثل عرضها في الحدث الأمريكي الشهير Super Bowl.
اللعبة أخذت المركز الثاني في أكثر الألعاب النامية على متجر iTunes، وقدرت تاخذ المركز الاول على لعبة الجوال المعروفة Clash of Clans ولكن لفترة محدودة.
باقي أهم سؤال: وشي اللعبة أصلاً؟ اللعبة هي لعبة استراتيجية أونلاين جماعي، تقدر تبني فيها امبراطوية وتكوّن لك جماعات مع أخوياك *يتثاوب* وتتضاربون مع أو ضد بعض… ايه، ومن هالألعاب اللي لعبناها لمئات المرات.
