محمد الشريف
آخر شهر في السنة، وأقل شهر تنزل فيه ألعاب! معروف بين اللاعبين ان هذا الشهر شهر جفاف، وان نادراً ما ينزل فيه ألعاب.
ولكن حنا اللاعبين دائماً وأبداً عندنا البدائل، وهي ألعاب الشهور اللي راحت. كثير من اللاعبين يأجل الألعاب الى وقت ثاني، الين ما يفضى، وأتوقع ان هذا الشهر هو الشهر اللي تقدر تحط فيه حرّتك مع الألعاب.
الحقيقة ان أكثر لعبة استمتعنا فيها هذا الشهر، هي لعبة نزلت الشهر اللي راح. لعبة حبيناها كثير وأعطيناها تقييم أسطورية، لانها أسطورية بالفعل. اللعبة هذي هي Tearaway.
تميّزت تير أواي بأشياء كثيرة مرة، لكن أهمّها العالم الورقي الخرافي حقها، الرسم جميل، والموسيقى جميلة، والشخصيات جميلة، والتحكم جميل، كل شي في اللعبة جميل ياخي!
اللعبة هذي هي اللعبة اللي كان يحتاجها بلاي ستيشن فيتا من طلوعه لنا. الكثير كان يقول انه يبغى يشتري بلاي ستيشن فيتا لكنه ماهو لاقي ألعاب تستاهل. نزلت تير أواي، وأعتقد ان هذي لعبة -بالاضافة الى ألعاب ثانية طبعاً- تخليك تفكر في شرائك للبلاي ستيشن فيتا.
فيديو اللعبة
وش أكثر لعبة استمتعت فيها هذا الشهر؟ شاركنا رأيك في التعليقات!
أيمن اليغشي
