محمد الشريف
في عالم األعاب الفيديو، تدخل نقاش وغالباً تتخلله السطور هذي:
“بلاي ستيشن أفضل من الاكس بوكس، يعطونك ألعاب حصريّة كثير والأونلاين عندهم ببلاش. هل الاكس بوكس عندهم كذا؟ لا، خلاص انتهى النقاش”
” ياخي رح بس أنت والبلاي ستيشن والأونلاين البايخ اللي فيه، صح الجهاز اللي ما فيه بارتي تشات! ياخي أنا أبغى أسولف مع أخوياي!”
تحاول تطلّعهم من الموضوع، بعدها بفترة تلقى الحوار رجع من جديد لكن بصورة ثانية:
” ياخي والله أنا أشوف ان جران توريزمو أفضل بكثير من فورزا، فورزا ياخي مدري ليه الناس تلعبها أصلاً!”
” ياعمي من جدك أنت؟ يالفانبوي أنت ولعبتكم جران توريزمو هذي اللي ثلاث أرباع البيئات فيها 2D، ولا الحوادث الخايسة اللي فيها!”
في الأخير، تكتشف ان الموضوع هذا متأصّل في عالم اللاعبين ومستحيل يخلو مجلس لاعبين منه. لذلك اليوم بنحاول نتناقش هذا الموضوع بشكل عميق أكثر من قبل.
تعريف التعصّب
كثير من اللاعبين يسمّي التعصّب فانبويزم (fanboyism). هذا أوّل عقدة في الموضوع أعاني منها مع الكثير من اللاعبين، ألاحظ الكل يعرّف التعصّب على هواه. فيه ناس تعتبرك متعصّب فقط لأنك تحب الشي الفلاني، أعرف ناس يسمّوني متعصّب لميتال جير سوليد فقط لأني أعتبرها أفضل لعبة بالنسبة لي. وهذا أغرب تعريف شفته للتعصّب، فالشخص هذا يعتبرك متعصّب ومتحيّز ويعيب عليك فقط لأنك تحب شي معيّن، وكأنه شي خاطئ!
يعرّف ويكيبيديا العربي التعصّب على انه: عدم قبول الحق عند ظهور الدليل بناءً على ميل الى جانب. وهو بالعامي انك ترفض الدليل الثابت اللي قدامك بسبب ميولك الى الشي اللي تحبّه.
التعصّب متأصّل في الانسان وموجود فيه من آلاف السنين. وينقسم التعصّب الى أقسام كثيرة منها: التعصّب الطائفي، التعصّب الرياضي، التعصّب القبلي، وغيره من أنواع التعصب. وفي العصر الحديث ممكن نضيف له أنواع تعصب جديدة مثل التعصّب التقني، مثل انك تتعصّب لويندوز على ماك أو العكس، أو انك تتعصّب لجهاز بلاي ستيشن ضد الاكس بوكس.
التعصّب ضد الحياديّة
هذا موضوع مهم جداً، كثير من الناس يعتقد انه حيادي بنسبة ١٠٠% وانه غير عاطفي، وانه -ما شاء الله- يتكلم بلسان الحق وين ما راح. وهذا كلام خاطئ طبعاً، لأن علم الاجتماع يقول ان يستحيل على الانسان انه يتجرّد من كل مشاعره ويصبح حيادي بشكل كامل. لازم في مرحلة من مراحل كلامه يطلع ميوله تجاه شي معيّن، سواءً بشكل مباشر أو غير مباشر.
الهدف من هذا اننا ما نطلب من الشخص انه يكون حيادي بنسبة ١٠٠%، ولكن نطلب منه انه يحاول يصير حيادي وواقعي قدر الامكان. اسمع كلام خصمك كامل، وفكّر فيه مرة ومرتين وثلاثة، بعدها رد عليه.
المتعصّب غالباً تلقاه ما يسمع كلام خصمه ولا يعتبره بأي شكل، لانه يعتقد انه على حق وان خصمه مخطئ.
هل متعصّبي عالم ألعاب الفيديو هم الأسوأ؟
لا طبعاً، فيه أنواع من التعصّب يوصل فيها التعصّب الى درجة انها تسمح بقتل الناس وابادتهم بشكل جماعي، مثل التعصّب الديني والطائفي والعرقي.
برضو فيه نوع من التعصّب متعلّق بالهوايات وهو التعصّب الكروي، واللي أعتبره من أسوأ أنواع التعصب على الاطلاق. كثير من الناس ألاحظ عليه انه متحدث لبق ويناقشك بشكل محترم، لكن من اللحظة اللي تفتح فيها موضوع الهلال والنصر ينقلب الشخص الرزين هذا الى كائن يصدر منه سب ولعن، ويستحسن انه يحط شماغه على كتفه ويرفع اصبعين وهو يتكلم، عشان ياخذ شخصية الرجل القوي!
هذا مو معناته ان التعصّب في عالم الألعاب بسيط ولا يحتاج اننا نهتم فيه، لانه في الواقع قوي وظاهر جداً. ادخل فيديو يوتيوب فيه مقارنة بين رسومات نسخة البلاي ستيشن ونسخة الاكس بوكس، وتفرج على النقاشات العقيمة!
وش الحل مع التعصّب في عالم ألعاب الفيديو؟
أي نوع من التعصّب له حل واحد: حاول تحكّم عقلك على عاطفتك قد ما تقدر. اسمع لكلام خصمك واحترم رأيه. كون خصمك يحب سليبينق دوقز ويعتبر انها أفضل من جراند ثيفت أوتو ما تعني ان الشخص هذا غلطان، لأن المسألة في النهاية مجرد رأي وأذواق فقط لا أكثر.
لكن للأسف هذا الحل ما راح يكون مفيد للكل، لأن كثير من المتعصبين يعتقد انه حكّم عقله من زمان وان الناس هي اللي عاطفية وماهي راضية تحكّم عقلها، وبكذا تستمر المشكلة الى ما شاء الله.
وش تعريفك أنت للتعصّب؟ وهل قد جاك يوم واعترفت انك متعصّب لجهاز أو لعبة؟ سولف لنا عن هالأشياء في التعليقات!
