كل عام وانتم بخير!

كل عام والجميع بخير، وتقبّل الله منّا ومنكم صالح الأعمال.

أتمنى -باسم فريق سعودي جيمر- انكم جميعاً قضيتوا أفضل الأوقات في هذا الشهر الفضيل، وانكم قضيتوا وقت للعبادة أكثر من ألعاب الفيديو وغيره من وسائل الترفية.

خلاص انتهى الشهر الرهيب اللي قبل أذان الفجر أسوي غزو على المطبخ، وأهجم على كل شي كأني زومبي شايف آدمي طبيعي في الشارع (واللي مدري ليه يشوفنا على شكل دجاج شوّاية)، وجا وقت العيد. ندري ان بعض الجيمرز يشوفون الزحمة في كل مكان ويتخيّل انه في Dead Rising، بحيث يقدر ياخذ ساطورة ويرميها على فلان، ولا ياخذ طفاية حريق ويرش على الناس المسكينة عشان يوخرون عنه. لا لا شلها من راسك! هذولي ناس طبيعين.

ما أعتقد يحتاج نوصيكم، لكن من باب التذكير نقول لكم لا تنسون تعيّدون على أهاليكم وأقاربكم وكل شخص رهيب في حياتك، ونشدّد على كلمة الرهيبين. برضه احرصوا ان كل العبادات اللي سويتوها في رمضان تكملون تسوونها باقي الشهور، وان العبادات ماهي حصرية لرمضان فقط.

بعيداً عن ألعاب الفيديو وغيره، وين بتعيّدون أجل؟ سولفوا معنا عن عيدكم 🙂