محمد الشريف
اذا أنت لاعب باتلفيلد (Battlefield)، فغالباً أنت متعوّد على كثرة المشاكل والأخطاء الموجودة في كل ألعابها، وبرضو متعوّد على كثرة التحديثات اللي تجي بأحجام كبيرة!
باتلفيلد 4 بالتحديد صارت فيه مشاكل كثيرة، لدرجة ان مطوّر اللعبة دايس (DICE) تكلّم عن التحديثات بشكل كثير ووعدوا الناس وعود كثيرة. فعلاً دايس أطلقت تحديثات، لكن المشاكل لسّا باقية للآن وحسب كلام بعض اللاعبين، ان هالمشاكل تخرّب عليهم تجربتهم.
لذلك، قرروا دايس انهم يوقفون شغلهم على اضافات اللعبة بشكل كامل، وانهم بيركزون كل تركيزهم على اصلاح اللعبة من المشاكل.
يقول المتحدّث باسم دايس:” حنّا عارفين ان قدامنا أكثر من طريقة نحل فيها مشاكل اللعبة، وحل مشاكل اللعبة بالنسبة لنا هو صاحب الأهميّة الأولى”.
برضو يقول المتحدث:” فريق عمل دايس شغّالين بشكل غير متوقّف على تحديث اللعبة. من أطلقنا التوسعة – أو الاضافة الكبيرة – الأخيرة وحنّا قرّرنا اننا ما نكمّل باقي المشاريع اللي عندنا الين ما نشوف حل لكل مشاكل اللعبة”.
أخيراً، المتحدث تكلم بشكل مثير للاهتمام عن انزعاج اللاعبين الكبير من هذي المشكلة وقال:” والله نعرف ان فيه لاعبين كثيرين منزعجين من هالموضوع، وحنا نحس بآلامهم، ما راح نوقّف شغل الين ما يتصلّح كل شي”.
ما اشتريت باتليفلد 4 للآن، قلت أنتظر الين ما يوصلني البلاي ستيشن 4 وألعب النسخة الأفضل. جربت نسخة البلاي ستيشن 3، الفرق الوحيد اللي قدرت أطلعه ما بين باتلفيلد 3 و4 هو ان شالوا رقم ثلاثة وحطّوا بداله أربعة. غير كذا ما قدرت.
حصلت لي الفرصة اني ألعب اللعبة على البلاي ستيشن 4 مرات كثير. لعبت الأونلاين ولاحظت انه لا زال ممتع ورهيب ويستاهل تشتري اللعبة عشانه. أما بالنسبة للمشاكل في اللعبة، فما أقدر أقول اني لاحظت مشكلة كبيرة وواضحة أثناء تجاربي البسيطة. كل المشاكل كانت مشاكل معروفة أشوفها دائماً في ألعاب دايس.
عموماً، يبدو ان دايس حالفة انها تصلّح لنا اللعبة. سالفة ايقاف كل اضافات اللعبة عشان يصلحون المشاكل اللي في اللعبة معناتها ان فيه مشاكل كبيرة جداً في اللعبة. وش المشاكل اللي واجهتها في باتلفيلد 4؟ علمنا هالمشاكل في التعليقات، وخلنا نشوف وش بيسوون دايس مع الوقت!
احمد خالد
بارعة
