ستديو بنجي (Bungie) المطور للعبة ديستني (Destiny) راح يصدر تحديث جديد للعبة ديستني و يسمح لك تغير الالوان داخل اللعبة لمراعاة اللاعبين اللي عندهم عمى الوان.
كتبوا بنجي على موقعهم الرسمي عن التحديث، مكتوب بالموقع على لسان براد فيش (Brad Fish) مسؤول هندسة واجهة اللعبة وقوائمها: “اتضح ان عملية تغيير الالوان الموجودة داخل اللعبة لدعم الناس اللي عندهم مرض عمى الالوان هي عملية معقدة و تحدي قوي بالنسبة لنا، احنا قدرنا نصنع اداة برمجية مرنة جدا للمصممين اللي عندنا و راح تساعدهم في تطوير شغلهم وتسهل العملية بالنسبة لهم”
احنا نشوف اللعبة كذة كلاعبين:
لكن الناس اللي عندهم مرض عمى الالوان راح يشوفوا اللعبة كذة:
مثل مانشوف بالصورة الالوان متضاربة وماتقدر تفرق بين الازرق و البنفسجي. الناس اللي عندهم مرض عمى الالوان – الله يبعدنا عنه- راح يشوفوا مثل الصورة وصعب يفرقوا بين الالوان.
لذلك ديستني راح تسمح لك بتشغيل خاصية جديدة لالوان اللعبة في تحديثها الجديد و اذا عندك عمى الوان لاقدر الله تقدر تغير الالوان بحيث تصير مثل الصورة:
الفكرة في التحديث هي ان المصممين ماغيروا الالوان نفسها لكن غيروا اضاءة الاشياء اللي باللعبة، نقدر نشوف بالصورة ان تقريبا المكعبين لونها ازرق لكن واحد اضائته عالية والثانية منخفضة وبالتالي الشخص اللي يعاني من عمى الوان راح يقدر يفرق بينهم ببساطة وسهولة اكبر.
وضح دافيد كانلاند (David Candland) مسؤول تصميم قوائم اللعبة و واجهتها ان بمجرد ما انك تفعل خاصية الالوان في اعدادات لعبة ديستني راح تقدر اذا كان عندك عمى الوان انك تفرق بين الجوائز بسهولة وتسهل عليك عملية تجميع الاشياء المميزة. ايضا بنجي حسنت قوائم اللعبة بشكل يناسب الاشخاص اللي يعانوا من عمى الالوان بحيث انك راح تفرق بين الاسلحة اللي تمتلكها بوضوح اكبر، و ايضا راح ترفع وعي اللاعبين وتساعدهم في تجنب حذف -او تكسير- الاسلحة الخارقة (Exotic) بشكل غير متعمد.
ايضا التحديث راح يسمح لك ان تتحكم بأصوات اللعبة بحيث انك تقدر ترفع صوت اصحابك في اللعبة اعلى من صوت اللعبة نفسها وهذا الشيء راح يحل مشاكل كثير تحدث في التواصل بين اللاعبين. وتقدر انك تكتم صوت اللعبة بالكامل لو تبغى.
ايضا راح يضيفوا مقطع صوتي جديد باللعبة، قال جاي وينلاند (Jay Weinland) رئيس الصوتيات في بنجي: “اضفنا مقطع ترفيهي بسيط في اللعبة وهو عبارة عن ايستر ايق – ايستر ايق يعني تلميحة او مزحة سرية في اللعبة وغالبا يكون لها علاقة بلعبة ثانية او فلم مشهور-، المقطع راح يكون موجود في اللعبة في مكان ما، اول ما يصدر التحديث حاول تلقى هذا المقطع وشوف هل تقدر تلقاه ولا لا”
التحديث ايضا راح يحسن اشياء بنفس اللعبة مثل زيادة مساحة المخزن (Vault) بحيث انك راح تقدر تحط فيه اسلحة اكثر بدل ما تضطر انك تكسرها. التحديث راح يحمل رقم 1.1.2
ديستني مازالت مستمرة بتحديثاتها البطلة، لكن اعيب عليها تأخير اضافتها القادمة لان اللاعبين بدأوا يملوا شوي من اللعبة ومن قلة محتواها و من توزيعها العشوائي للجوائز.
اش رايك بالتحديثات وهل مازلت تلعب اللعبة؟
