انطباعنا عن Dead Rising 3 وتوجهها للعالم المفتوح [E3 2013]

ديد رايزينق 3، من الألعاب اللي تفاجأنا فيها في مؤتمر مايكروسوفت. خصوصاً انها بتكون حصرية لأجهزة مايكروسوفت، ولكن هل كان قرار مايكروسوفت في مكانه؟

أول شي لاحظته ان الجرافيكس ما يرتقي لباقي ألعاب الجيل القادم اللي شفناها، ولكن النسخة اللي شفناها كانت Tech demo “نسخة غير نهائيّة”.

ذكر المقدّم ان الأسلحة بتكون في كل مكان في اللعبة، كل شي في اللعبة تقدر تستخدمه كسلاح وتلقاه موجود في كل مكان. واللي لاحظته في الأسلحة انك ما تقدر تستخدمها لفترة طويلة، تضرب ضربات عديدة بعدها ينكسر منك السلاح. حتى المسدسات والرشاشات اذا انتهت الطلقات لاحظت ان الشخصية ترمي السلاح تلقائياً.

وبما ان الأسلحة كثيرة، حطوا لنا في اللعبة مخزن للأسلحة نقدر نرجع له متى ما بغينا وناخذ منه الأسلحة اللي نحتاجها. فيه خزنة ثانية برضو للملابس، أي لبس تلقاه في اللعبة وتلبسه راح يتخزن تلقائياً في مخزن الملابس بحث تقدر تلبس اي لبس تبغاه متى ما رجعت للمخزن.

فيه عندك سيارات تسوقها عشان تنتقل في المدينة بشكل أسرع، ولكن أحلى شي تسويه وانت تسوق السيارة انك تلقى مجموعة زومبيز في الشارع. الجديد انك اذا دعست الزومبيز، بتلاحظ ان بعضهم يتعلقون في السيارة ولازم تنتبه لهم، لانهم اذا وصلوا للقزاز احتمال انهم يضربونك.

من الأشياء الجيدة اللي لاحظتها ان دائماً عندك أكثر من طريقة للوصول للهدف اللي تبغى توصله، كل ما دخل مكان فيه زومبيز يرجع يطلع برا ويدخل من بيت ثاني او يروح من شارع ثاني الين ما يوصل للهدف.

كيف العالم المفتوح؟

بشكل عام لا بأس فيه. ما لاحظت اني في عالم كبير جداً أقدر أتمشى فيه على كيفي، ولكنه كان عالم كبير لا بأس فيه. والأهم من هذا كله ان المقدّم أكّد على ان مافيه فترات تحميل اذا انتقلت من مكان الى مكان ثاني في اللعبة. يبدو اننا بدينا نشوف ميزات الجيل القادم من الحين.

سمارت جلاس.. تكفى استخدمني

من أكثر الأشياء اللي لاحظت دخولها بقوّة هي الأجهزة اللوحية. في كل مرة يعرضون لنا لعبة جديدة نشوف المقدّم يبتسم لنا بتسامة عريضة ويقول: ترا تقدر تسوي الشي الفلاني عن طريق التابليت!

وديد رايزينق 3 من الألعاب اللي بتدعم هذي الأشياء. بيكون بامكانك تسوي ضربات جويّة على الزومبيز اذا كانوا مجتمعين في مكان واحد. جيّدة اللقطة وحبيتها، ولكن هل تسوى علي اني اجيب التابليت بس عشان أسوي هالحركة؟ ما أتوقع.

عموماً، اللعبة بشكل عام شكلها واعد. صحيح ان الأجزاء السابقة ما كانت ناجحة نجاح ساحق، لكن يبدو ان كابكوم ومايكروسوفت ناوين يحسّنون من مستوى اللعبة. بتنزل اللعبة هذي السنة مع نزول Xbox One في نوفمبر.

هل تشوف ان قرار مايكروسوفت كان صحيح في حصرية الجزء الثالث من ديد رايزينق 3؟ شاركنا برأيك في التعليقات!