لعبة ذا ويتشر 3 وايلد هنت (The Witcher 3: Wild hunt) نزلت في الاسواق من يومين بالضبط، من يوم نزولها الناس بدأت تشتكي من تخفيض قوة الرسوم مقارنةً بالعرض التشويقي اللي تم اطلاقه للعبة قبل عامين في معرض VGX.
العرض التشويقي تبع معرض VGX:
المقطع يوضح قوة الرسوم في اللعبة و كانت قوية جدا في العرض، لكن بعد اصدار اللعبة اللاعبين قارنوا رسوم اللعبة النهائية بهذا المقطع ولاحظوا ان الرسوم ضفعت بشكل كبير جداً، هذا الشيء غالبا بسبب ان اللعبة نزلت على الاجهزة المنزلية واجبرت استديو سي دي بروجكت ريد (CD Projekt Red) انهم يضعفون الرسوم.
بسبب هذا الكلام تم اجراء مقابلة خاصة مع ثلاثة اشخاص من استديو سي دي بروجكت ريد عن هذا الموضوع، كان في المقابلة مارسين ايوينسكي (Marcin Iwinski) مساعد مؤسس الشركة، ادام بادوسكي (Adam Badowski) رئيس الاستديو و مايكل قليويسكي (Michal Gilewski) مدير التواصل.
قبل المقابلة الاستديو وضح ان اللعبة راح يصدر لها تحديث قريبا يحسن الرسوم، التحديث راح يعدل 600 شيء ومنها الرسوم واعداداتها و راح يتم اعطاء تفاصيل اكثر عن التحديث في المستقبل، ايضا راح يتم اصدار تحديث اخر لاجهزة البي سي يسمح للاعبين انهم يعدلون الملفات بصيغة .ini واللي راح تساعد على تحسين الرسوم بشكل كبير جدا، راح تقدر تعدل على الزرع و كثافة الزرع و المؤثرات العامة ودقة اللعبة وحدتها، كل ذي الاشياء راح تقدر تعدلها خلال التحديث الخاص للبي سي، ايضا وضح ادام انهم شغالين على اضافة طرق اكثر لتحسين رسوم اللعبة.
هل الاجهزة المنزلية قللت من قدرات اللعبة على اجهزة البي سي؟
قال مارسين مساعد مؤسس الشركة: “بدون الاجهزة المنزلية ما كنا راح نقدر نطور اللعبة بهذا الشكل الكبير، لأن بدون الاجهزة المنزلية ماراح نقدر نمول اللعبة بالقدر الكافي، ببساطة الاجهزة المنزلية راح تعطينا ارباح اكبر و مبيعات اكبر، وهذا الشيء راح يسمح لنا ان يكون عندنا ميزانية اكبر لتطوير اللعبة، واحنا انفقنا كل الميزانية في تطوير اللعبة لإصدارها بهذا الشكل الجميل و لتحسين وتوسعة عالمها الضخم”
كمل ايضا: “تطوير اللعبة لاجهزة البي سي فقط راح يسمح لنا اننا نقوي الرسوم بشكل اكبر، لكن ماراح نقدر نحسن اي شيء اخر، راح يكون التركيز فقط على اجهزة البي سي ولكن احنا ماراح نقدر نمول اللعبة اذا كانت حصرية لجهاز واحد فقط”
ليش تغيرت الرسوم؟
قال مارسين: “اذا نظرت إلى عملية التطوير، احنا نبني اللعبة بمراحل مختلفة و في كل مرحلة نختبرها بشكل تجريبي، في البداية اختبرناها برسوم قوية ونجحت في عالم بسيط وصغير، وكانت اللعبة ممتازة من ناحية الرسوم، في هذي اللحظة تكون بعيد جدا من المرحلة النهائية للتطوير، و تجرب تحط نفس الخلطة في عالم مفتوح و ضخم لكن الامور راح تسوء و تكتشف ان اللعبة ماراح تشتغل بنفس الرسوم و راح يصير فيها مشاكل، احنا اظهرنا العرض التشويقي قبل عامين و كنا شغالين على تشغيل اللعبة بهذي الرسوم، لكن ماقدرنا وهذا الشيء طبيعي في عالم تطوير الالعاب”
قال ادم بادوسكي ايضا: “العرض التشويقي قبل عامين كان مأخوذ من جهاز البي سي، احنا ماراح نقدر اجادل الناس اللي تشوف ان الرسوم ضعفت الان، لكن فيه اسباب تقنية معقدة وراء هذا الشيء”
كمل ايضا ادم وقال: “ممكن كان قرار سيء اننا نضعف الرسوم، احنا كان عندنا اختيارين لكننا قررنا بوضع الرسوم الحالية لأنها اجمل في عالم اللعبة ككل، وفي الليل او النهار، الاختيار الثاني كان راح يتطلب ديناميكية كبيرة في الاضاءة و بوجود عالم ضخم مثل عالم اللعبة ماراح نقدر يشتغل هذا الاختيار”
ايضا وضح ان المؤثرات القوية مثل الدخان و النيرام ماراح تشتغل مثل العرض الا بوجود جهاز يدعم برنامج DirectX 12، و الاستديو ماكان يبغا يجبر الناس انها تغير جهازها وتشتري جهاز بمواصفات عالية.
قال مايكل :”الناس يقولوا ان عرض عام 2013 كان أفضل لكن في الحقيقة في اشياء كثيرة تم تحسينها من عام 2013، عالم اللعبة وعدد الفريمات كمثال”
كمل على كلام مايكل الاخ ادم وقال: “اداء اللعبة على كلام اللاعبين ممتاز جدا، هذي اول مرة للشركة انها تطور لعبة بهذا الاداء الممتاز”
ومارسين قال ايضا: “ممكن كان من الافضل عدم اصدار العرض التشويقي قبل عامين، ما أعرف ايش الصح، لكن احنا ماكنا نعرف ان اللعبة ماراح تشتغل بنفس مواصفات العرض التشويقي، يعني احنا ماكذبنا او خدعنا الناس بالعرض التشويقي، ولهذا السبب احنا ماردينا على الشكاوي اللي جاتنا من الناس، احنا في نظرنا ماضعفنا قوة الرسوم وهذا رأينا، اللاعبين ممكن يشعرون بشيء ثاني، اذا هم قرروا انهم يشترون اللعبة على اساس عرض عام 2013 انا اسف جدا لهم، واحنا جالسين نتناقش عن طرق ارضائهم لأن اللي صار غير عادل”
كمل مارسين وقال: “لازم نأكد اننا مستمرين في تحسين نسخة البي سي، راح نضيف اشياء كثيرة لها، اثبتنا في اجزائنا السابقة دعمنا لألعابنا بعد اطلاقها واحنا راح نشوف اراء الناس وردود افعالهم و نحاول نحسن اللعبة قدر المستطاع”
ليه ما قلتوا اي شيء عن هذا الموضوع الى الان؟
قال مارسين: “لأننا ماشفنا انها مشكلة من الاساس، يعني تبغانا مثلا اننا نقول اننا غيرنا بعض الاشياء في اللعبة و الان راح تصير اللعبة بهذي الرسوم؟” الشخص اللي بيسأل في المقابلة رد عليه و قاله طيب يعني انت كأنك جالس تخفي شيء عن اللاعبين، كان رد مارسين: “الان راح نختلف بشدة، لأننا ما حاولنا ان نخفي اي شيء” وقال بادوسكي انك ماتقدر تخفي شيء واضح للناس في المقاطع ويقدرون يقارنون بأنفهسم لملاحظة الفرق.
قال مارسين: “احنا ماحسينا بشعور جميل بعد ما ضعفنا الرسوم، وانا اخذت الموضوع بشكل شخصي جدا، ممكن ماراح تلاحظون هذا الشيء لأننا كنا بنبذل كل جهدنا لاطلاق اللعبة” وكمل مايكل على كلام مارسين وقال ان الفريق كله كان متأثر من هذا الشيء.
مارسين قال: “اذا لعبت اللعبة و ماناسبك اللي صار، هذا الشيء فعلا مؤثر، واحنا راح نفعل الافضل لتحسين اللعبة لك، لكن اذا انت مالعبت اللعبة وجالس تتكلم بدون تجربة، اتمنى انك تفكر مرتين قبل ما تتكلم لو سمحت”
اضاف مارسين: “بطريقة ما، بسبب اننا مالاحظنا المشكلة وكنا بنعمل بكل جهدنا لاطلاق اللعبة، الان احنا بعد الاطلاق نتناقش عن هذي المشكلة ولازم نوضح الاسباب، اتمنى ان هذي الاسباب تظهر نيتنا، لأننا ماعندنا شيء نخفيه، بالنظر الى قيمنا في الاستديو، اخفاء شيء عن الناس هو شيئ ما ودنا نسويه ابدا”
وقال: “وللناس اللي ماقرروا بنسبة 100%، انا اشجعهم على الانتظار لرؤية تحديثاتنا الثادمة للعبة”
شيء جميل ان الاستديو يبرر بهذا الشكل، لكن احس ان في تناقض في كلامهم شوي، كيف مالاحظ المشكلة وهو زعلان من يوم اطلاق اللعبة؟ لكني اعتقد ان السبب واضح وهو ان اللعبة نزلت على الاجهزة المنزلية، وطالما انهم راح يسحنوا اللعبة على البي سي اشوف ان هذا كافي.
