مثل ماشفنا الاسبوع اللي راح اعلنت يوبي سوفت (Ubisoft) عن جزء جديد للعبة اسيسنز كريد (Assassin’s Creed) اسمه يونيتي (Unity). المصادر تقول انه يوبي سوفت راح تنزل لعبتين في الخريف القادم، اسيسنز كريد يونيتي واسيسنز كريد كوميت (Comet).
و زي مانعرف انه لعبة يونيتي راح تكون احداثها عن ثورة فرنسا، واللعبة راح تصدر على اجهزة البي سي واجهزة الجيل الجديد بلايستيشن 4 (Playstation 4) و اكس بوكس ون (Xbox one). بالنسبه لجزء كوميت، راح يصدر على اجهزة الجيل القديم بلايستيشن 3 واكس بوكس 360. مافي اي اخبار عن انها تصدر على الوي يو (Wii U) او البي سي.
حسب تقارير من موقع فرنسي اسمه جيم بلوق (GameBlog) نشروها امس عن اللعبة، تقول التقارير انه تدور احداث اللعبة في سنة 1758، وانه البطل حق اللعبة واحد بحّار اسمه شاي (Shay) اللي بدوره قام بخيانة قبطان سفينته، مكان اللعبة هو المحيط الأطلسي. ويقول ايضا انه اللعبة راح تحمل طابع بحري مشابه للي شفناه في الجزء الاخير من السلسلة اللي هو بلاك فلاق (Black Flag).
المصدر اللي جايب اخبار قيم بلوق يقول انه مايقدرو ياكدو هذه المعلومات التخمينية من موقع قيم بلوق. لكن الناس المقربين من اللعبة يقولو انه بالفعل هذا الجزء اللي هو كوميت راح يكون في امريكا الشمالية وبطل اللعبة شخص اسمه شاي، و ايضا اضافو انه راح يكون عضو من التيملرز (Templars) ومثل مانعرف في سلسلة اسيسنز كريد انه التيملبرز مكروهين من الاسينسنز وانه التملبرز هم الخصم الرئيسي لهم.
المصدر اضاف انه اللعبة راح تسمح لك تروح لمدينة نيو يورك (New York) وحتخليك تبحر بشكل رهيب في ساحل المحيط الاطلسي.
هذي الاخبار راح تعطي النقاد مساحة انهم ينتقدو هذي السلسلة اللي قاعده تنزل لعبة كل سنة لانهم هذي السنه راح ينزلو لعبتين بدل لعبة واحدة!، زي مانعرف انه الجزء الاخير كان موجود على الجيل القديم والجديد، لكن الخريف القادم راح تنزل لعبتين منفصلة لكل جيل، بحيث انه اللي يبغا يجرب اللعتين لازم يكون عنده الجهازين لانه لا البلايستيشن فور ولا الاكس بوكس ون يدعمو اقراص الجيل القديم. وفي نفس الوقت هذا القرار راح يعطي حرية اكبر لمصممي لعبة يونيتي بحيث انهم يقدرو يستغلو كامل طاقات الجيل الجديد.
المصدر يختم و يقول انه طريقة يوبي سوفت في تقسيم فرق التطوير عندها بحيث كل فريق يخلص لعبة في سنتين او ثلاثة عشان ينزلو لعبة كل سنة مااثبتت لا نجاح ولا فشل، لانه مثل ماشفنا في اجزاء كانت سيئة والنقاد ماقصروا معاها وفي اجزاء مثل الجزء الاخير كانت محبوبة جدا عند عشاق السلسلة والنقاد.
المصدر يختم بمعلومة مهمة وهي: في اخبار تقول انه كوميت راح تكون متوفرة على اجهزة الجيل الجديد. هذي الاخبار غير صحيحة ابدا حسب الاشخاص اللي اتحدثنا معاهم. وهي اخبار ملفقة و مكذوبة. حسب ماسمعنا انه كوميت غير موجودة في مخططات اجهزة الجيل الجديد.
وجهة نظري انه حركة غريبة من يوبي سوفت. اعتقد انه كوميت راح تكون نسخة مصغرة من السلسلة و يونيتي هي اللي راح يكون عليها الكلام و الشفل. يعني زي لما سلسلة تقرر تنزل جزء على البلايستشن فيتا (Playstaion Vita) و جزء على البلايستيشن 3، اللي على البلايستيشن 3 هو اللي عليه الشغل والثاني راح يكون جزء مصغر وتمشية حال. هذا توقعي وممكن اكون غلطان وتكون اللعبتين رهيبة. وفكرة انك تلعب بتمبلر فكرة جديدة ومحمسة وراح تكون في كفة ايجايبات جزء كوميت، وايضا انه موجودة السفن فيها هذي ايجابية لها في حال ماكان فيه سفن في جزء يونيتي.
اش رأيك عزيزي القارئ تشوف انه نصب طريقة يوبي سوفت ولا تشوف انه احسن فرقوا بين الجيلين واعتبرو كل جيل له مميزاته وامكانياته؟؟ واش رايك في اخبار الجزء نفسه؟ تشوف انك اكتفيت من السفن والبحار ولا تبغا تبحر اكثر؟؟ واذا عندك رأي مختلف شاركنا.
