محمد الشريف
في وسط الحرب الاعلامية بين سوني ومايكروسوفت، وفي رد لسوني على اعلان مايكروسوفت لاكس بوكس ون وعدم عرضه للأسماء الحقيقية، أعلنت سوني اليوم ان جهازها الجاي بلاي ستيشن 4 راح يعطي اللاعب امكانية انه يعرض اسمه الحقيقي، عكس الاكس بوكس ون.
سوني، في الفترة الأخيرة مبدعة ابداع كبير في تسويقها للبلاي ستيشن 4، عكس مايكروسوفت بالتمام، واللي بعض الأحيان يهيّأ لي انها جالسة تستهبل وماهي ماخذة الأمر بجدية، لولا ان الأمور التجارية مافيها لعب ولف ودوران. انقلبت الآية بعد ما كان العكس.
اليوم موضوعنا ماهو عن تسويق سوني ومايكروسوفت، ولكن عن اعلان سوني لامكانية عرض اسم اللاعب الحقيقي في شبكة البلاي ستيشن. أشوف الموضوع مسوّي ضجة بين اللاعبين، ولكني ماني قادر أفهم كيف ميزة زي هذي بتسبّب هذي النقاشات بين اللاعبين. التفسير الوحيد اللي لقيته ان المتعصّبين يدوّرون على أي فتحة ابرة يقدرون يلقونها ويدخلونها عشان يتصارعون مع الطرف المعادي لهم.
شخصياً، أشوف ان امكانية استخدام اسمي الحقيقي اضافة جميلة، لكن مستحيل أحسبها كميزة ضد الاكس بوكس ون.
في الشبكات الاجتماعية على الانترنت، دائماً أستخدم اسمي الحقيقي وصورتي الحقيقية، ودائماً أفضّل التعامل مع الأشخاص اللي يكتبون اسمهم الحقيقي وصورتهم الحقيقية على أشياء وهمية. أفضّل أسولف مع خالد وأحمد ومحمد وريم وفاطمة (هلا واااالله بالزين) على العاشق الولهان، و طيّب في زمن غدّار، و التائه الأسير، و المسكينة في الحب التي خدعها الغدّارين -حسبي الله عليهم-، و الرجل الغامض الذي يسير وحيداً في الظلام.
هذي بتكون اضافة جميلة بالنسبة لي، أقدر أضمن لكم اني بأفعّل خاصّية استخدام اسمي الحقيقي من أول ما أستلم البلاي ستيشن 4، بالاضافة الى صورتي الحقيقية. طبعاً قضيّة اني أبغى أسحر الناس اللي عندي في الفريندز بجمالي الذي يخلب القلوب بلا رحمة هذي على جنب، لكنّي -ومن جديد- أفضّل الناس تشوف شخصي الحقيقي على الانترنت بشكل عام.
هذا كان بالنسبة لي! بالنسبة لك، هل تفضّل استخدام اسمك الحقيقي في البلاي ستيشن فور أو اكس بوكس ون (اذا فعّلوها) عند أصحابك على الشبكة؟ وليش؟ شاركنا برأيك في التعليقات!
احمد خالد
