مشهور الدبيان
مثل ما ذكرت سابقاً في هاشتاق #تغطية_Titanfall، دعتني شركة EA الى لندن لتجربة لعبة Titanfall الحصرية على أجهزة الاكس بوكس والبي سي.
قبل ما أجرّب اللعبة كنت أعتقد انها مجرّد لعبة تصويب أخرى، خاصة ان الشركة المطوّرة للعبة تتبع لشخصين كانوا مسؤولين عن تطوير كول أوف دوتي. لكن تفاجأت باللي شفته صراحة! كميّة أشياء “جديدة” و”رهيبة” ما توقّعت أشوفها في لعبة تصويب.
العناصر اللي راح أذكرها هي أشياء ممكن شفناها في ألعاب قبل كذا، لكن وجودها (واجتماعها) في لعبة تصويب هو شي جديد أو على الأقل نادر بالتأكيد!
1. الرجال الآليين
صعبة نتكلم عن Titanfall وما نجيب طاري أساس اللعبة اللي هم الرجال الآليين (الضخمين). اللعب بالرجال الآليين جداً ممتع ومتوازن، ويحتاج الى مهارة وتكتيك. بالاضافة الى ذلك اللعبة فيها توازن ممتاز بين الرجال الآليين والجنود. ما تحس فيه واحد أقوى من الثاني، ظروف المعركة والبيئة المحيطة هي اللي تحدّد مين أقوى.
2. اللياقة العالية عند الجنود
ما حبّيت اسميها “قدرات خارقة” لان فعلياً كلها محصورة في “المناقز”. الجندي بامكانه يتسلّق، ويركض على الجدران، وينط نطّتين في الهواء، ويطيح من أعلى ارتفاع بالعالم بدون ما يموت. هالخاصّية تسرّع اللعب وتصعّب على الرجال الآليين انهم يقتلون الجنود. ومهارة الركض على الجدران لو تتقنها بتصير تقدر تقطع مسافات طويله في المرحلة بدون ما تلمس أرض الشارع!
الفيديو هذا سجّلته من المهمّة التدريبية، ويوضّح لك اللياقة الموجودة عند الجنود:
3. المسدّس الذكي
المسدّس هذا ذكّرني باسلوب اطلاق الرصاص في فلم Wanted، تقدر بطريقة معيّنة تخلي الرصاصه تنطلق مشكل منحني بحيث تقتل هدفك حتى لو ما كنت موجّه المسدّس عليه. ويسمح لك بعد تطلع على أكثر من هدف بنفس اللحظه طول ما هم في مجال المسدّس اللي محدّدينه لك. كفكره يبدو بسيط، لكن بتكتشف خلال اللعب ان اتقانه يحتاج الى مهاره. واللي يتقنه بيصير انسان بثر جداً خلال اللعب!
4. المنافسة تنتهي بشكل غير تقليدي
عادة في ألعاب الأونلاين الفريق اللي يجمّع نقاط أكثر هو اللي يفوز وتنتهي اللعبة. بس في Titanfall الفريق الخاسر بيكون عنده فرصة الهروب من أرض المعركة عند طريق طيارة توصل لها وتاخذ أكبر عدد ممكن من الجنود اللي يلحقون عليها، ويكسبون نقاط اضافية قبل نهاية اللعبة. الفريق الفائز عنده خيارين: اما يحاول يقتل اكبر عدد من الجنود قبل ما يهربون، أو يركّز جهوده على الطياره اللي جايه تاخذهم ويحاول يطيّحها.
هالحركة تخلي اللعبة تنتهي بحماس كبير يحاول في الفريق الفائز “اذلال” الخصم، ويحاول الفريق الخاسر انه يطلع بأقل الخساير. الحركة هذي غير موجودة في طور Last Titan Standing لانها مرتبطه بتدمير الرجال الآليين فقط.
5. عمق طور الأونلاين
شفنا ألعاب كثير تعطيك خيارات كثيرة جداً لتطوير لاعبك في طور الأونلاين. لكن اللي يخلي Titanfall مختلفة عنهم هو انك تحتاج تضبّط الجنود والآليين حقينك بنفس الوقت، مو بس الجندي. في كل معركة بتحتاج تختار أي جندي “و” آلي تبي تدخل فيهم، مو بس الجندي لحاله، وهالشي بيتحدّد بناء على عوامل كثير، ومن أهمها الجنود والآليين في الفريق الخصم.
في الختام
اتوقع للعبة هذي تنافس وبشكل كبير كول أوف دوتي وبتل فيلد. من زمان ما جرّبت لعبة تصويب حسّيت ان عندها فرصة حقيقية في المنافسة. تمنّيت صراحة تكون متوفره على جميع الأجهزة، لكن للأسف انها حصرية حالياً (أو هذا الجزء على الأقل)، لكن نسخة البي سي متطلباتها قليلة جداً جداً، فممكن تعطيك مجال تجرب في حال ما عندك أي جهاز اكس بوكس.
بارعة
أيمن اليغشي
سندس الخباز
مصطفى عرجون
احمد خالد